Korkut Ata Türk Dünyası Film Festivalında iki Krım sənədli filmi yarışacaq

Türk dünyasının filmlərini bir araya gətirən 6-cı Korkut Ata Türk Dünyası Film Festivalı noyabrın 3-dən 7-dək İstanbulda keçiriləcək. Sənədli film müsabiqəsinə Krım mövzulu iki əsər də daxil edilib.

Elmaz Asanın çəkdiyi “Yanıp Duran Yürek” Krım tatar milli hərəkatının veteranı, Mustafa Abdülcəmil Kırımoğlunun həyat yoldaşı Səfinar Cəmilevanın həyat hekayəsini danışır. Film festivalda Ukrayna adından iştirak edir və 1-ci Beynəlxalq Krım Film Festivalında münsiflər heyətinin xüsusi mükafatını qazanıb.

Tunç Boranın “Sönmeyen Ateş” filmi Konar kəndində yaşayan və ən böyük arzusu Krımı görmək olan bir kişinin vətən həsrətindən bəhs edir. Türkiyə adından yarışan bu film də 1-ci Beynəlxalq Krım Film Festivalında tamaşaçı mükafatını alıb.

Hər iki filmin nümayişi noyabrın 5-də İstanbulda, Beyoğlundakı Grand Pera ticarət mərkəzinin 4-cü mərtəbəsində olacaq: “Yanıp Duran Yürek” saat 18:00-da, “Sönmeyen Ateş” isə 20:00-da.