Nobel mükafatçısı Əziz Sancarın doğulduğu Savurda (Mardin) onun adını daşıyan muzey açıldı

Türkiyənin Mardin vilayətinin Savur rayonunda oktyabrın 21-də Nobel mükafatçısı professor Əziz Sancarın adını daşıyan muzey ziyarətə açılıb. Mədəniyyət və Turizm naziri Mehmet Nuri Ersoy və Mardin valisi Tuncay Akkoyun açılış mərasimində Sancarın özü ilə birlikdə iştirak ediblər.

Muzey Sefa məhəlləsində, alimin doğulub böyüdüyü tarixi malikanədə yerləşir. Mədəniyyət və Turizm Nazirliyi binanın bir mərtəbəsini bərpa edərək muzeyə çevirib. Üç salonda cəmi 395 kvadratmetr sahədə Sancarın həyatını əks etdirən fotoşəkillər, tibbi alətlər, diplomlar, akademik mantiyalar, hədiyyələr, mükafatlar və elmi işlərinə dair sənədlər nümayiş olunur.

Mardin Valiliyi binanın zirzəmi və yuxarı mərtəbələrində oxu zalı və elm mərkəzi yaratmağı planlaşdırır. Savur bələdiyyə başçısı Engin Uğur Hamidi birinci mərtəbədə TÜBİTAK Elm Mərkəzinin yerləşdirilməsinin nəzərdə tutulduğunu bildirib; Sancar bu layihənin dəstəklənməsini TÜBİTAK ilə müzakirə edəcəyini deyib.