Prezident Qarabağ Milli Parkının yaradılması haqqında Sərəncam imzaladı: park 88 418 hektar ərazini əhatə edəcək

Prezident İlham Əliyev oktyabrın 20-də Qarabağ Milli Parkının yaradılması haqqında Sərəncam imzalayıb. Sənədin preambulasında Qarabağ və Şərqi Zəngəzur iqtisadi rayonlarının zəngin təbii irsə malik olduğu, erməni işğalı dövründə isə burada biomüxtəlifliyə ciddi ziyan vurulduğu qeyd edilir.

Sərəncama əsasən park Ağdərə, Xocalı, Kəlbəcər, Şuşa və Laçın rayonlarının dövlət torpaqlarından ayrılan 88 418 hektar sahədə yaradılır. Ən böyük hissə, 44 773 hektara yaxın sahə Ağdərə rayonunun payına düşür. Bu torpaqlar xüsusi mühafizə olunan təbiət ərazisi kateqoriyasına aid edilir.

Sənəddə məqsəd kimi xüsusi mühafizə olunan təbiət ərazilərinin şəbəkəsinin genişləndirilməsi, regionun ekosisteminin və təbii irsinin beynəlxalq aləmdə tanıdılması, biomüxtəlifliyin bərpası və qorunması, təbii ehtiyatlardan davamlı istifadə və ekoturizmin inkişafı göstərilir. Sərəncamdan irəli gələn məsələlərin həlli Nazirlər Kabinetinə həvalə olunub.