Prezident Xocavənddəki Azıx və Tağlar mağara düşərgələri əsasında “Azıx-Tağlar Arxeoloji Parkı” Dövlət Qoruğu yaratdı

Prezident İlham Əliyev oktyabrın 21-də Bakıda sərəncam imzalayaraq Xocavənd rayonundakı Azıx və Tağlar mağara düşərgələrinin əsasında “Azıx-Tağlar Arxeoloji Parkı” Dövlət Qoruğunun yaradılmasını təsdiq edib.

Sənədə görə, məqsəd hər iki abidəni mədəni irs kimi qorumaq, bərpa etmək və elmi cəhətdən öyrənmək, onların arxeoloji dəyərini ölkə daxilində və beynəlxalq səviyyədə tanıtmaqdır. Qoruğun idarə olunması Mədəniyyət Nazirliyinə həvalə edilib.

Nazirlər Kabineti üç ay ərzində qoruğun sərhədlərini və mühafizə zonasını müəyyən etməli, əsasnaməsini təsdiq etməli, xüsusi rejimini qurmalı və maddi-texniki təminatı həll etməlidir. Xərclər Mədəniyyət Nazirliyinə ayrılmış büdcə vəsaiti hesabına ödəniləcək.