Topkapı Sarayında yeddi illik bərpadan sonra Darphane-i Amire yerində 5 muzey açıldı

İstanbuldakı Topkapı Sarayının birinci həyətində yerləşən tarixi Darphane-i Amire (Osmanlı Zərbxanası) kompleksi yeddi illik bərpadan sonra muzey məkanı kimi yenidən açılıb. Oktyabrın 24-də keçirilən mərasimdə Türkiyə Prezidenti Rəcəb Tayyib Ərdoğan çıxış edib. Ziyarətçilər üçün muzeylər oktyabrın 25-dən işləyir.

17 min kvadratmetrlik ərazidə 7 bina və 46 salon beş muzeyə çevrilib: Xəritə, Hüsni-xət əsərləri, Zərbxana və Sənaye alətləri, Esliha-i Hümayun (Saray silahları) və Saray çinisi muzeyləri. Sərgilərdə Topkapı inventarından 10 min 500 əsər nümayiş olunur; bunlara 2 mindən çox xəttatlıq nümunəsi, 2,5 mindən artıq hərbi eksponat, o cümlədən Fateh Sultan Mehmedin qılıncı və zirehli köynəyi daxildir.

Kompleksdə Milli Saraylar Tədqiqat Mərkəzi də fəaliyyət göstərəcək: orada 800 mindən çox yazılı və vizual mənbəyi əhatə edən kitabxana və rəqəmsal arxiv var. Zərbxananın iki binası isə müvəqqəti sərgilər və tədbirlər üçün sənətçilərə və ictimai təşkilatlara ayrılıb.

Ərdoğan çıxışında Osmanlı-Türk irsinin təsadüfün deyil, uzun mədəni və intellektual təkamülün məhsulu olduğunu vurğulayıb, əsas məqsədin bu irsi qoruyub zənginləşdirərək gələcək nəsillərə ötürmək olduğunu bildirib. Sarayın əlyazma və çap əsərləri kitabxanasının da kompleksin üç binasına köçürülməsi planlaşdırılır.