"Yeni Daşkənd"də 1 milyard dollarlıq 7 obyekt istifadəyə verildi, 2,5 milyard dollarlıq 10 yeni layihənin təməli qoyuldu

Oktyabrın 12-də Özbəkistan Prezidenti Şavkat Mirziyoyev ölkə tarixinin ən böyük şəhərsalma layihəsi olan "Yeni Daşkənd"də yeni obyektlərin açılış mərasimində iştirak etdi. Ümumi dəyəri 1 milyard dollar olan yeddi obyekt istifadəyə verildi: təxminən 7 min mənzilli "Şərq bahorı" yaşayış kompleksinin birinci mərhələsi, 2 min şagird üçün məktəb, sahil boyu 10 kilometrlik piyada və velosiped yolları olan "Sohil boği" parkı, Ticarət-Sənaye Palatasının binası, 18 kilometr yol, 13 kilometr kanalizasiya və 4,5 kilometr içməli su xətti.

Enerji obyektləri arasında Çinin "Haocheng" şirkəti ilə 95 milyon dollara tikilən 1 nömrəli yarımstansiya və Türkiyənin MIMSAN şirkəti ilə 73 milyon dollara inşa edilən triqenerasiya stansiyası var. Sonuncu eyni anda elektrik, istilik və soyutma istehsal edir və 100 min ailəni mərkəzləşdirilmiş istilik və soyutma ilə təmin edə bilər.

Mərasimdə Çin, Türkiyə, BƏƏ və digər ölkələrin tərəfdaşlığı ilə ümumi dəyəri 2,5 milyard dollar olan 10 yeni layihənin icrasına start verildi. Onların arasında yarımkeçirici və yüksək texnologiyalar istehsalı üçün "Deep Tech Park" sənaye zonası (ilkin sərmayə 320 milyon dollar), tullantılardan enerji alınması, yaşayış binalarının damlarında 20 meqavatlıq günəş panelləri, 818 min kvadratmetrlik "Metropolis" işgüzar şəhərciyi, metroya bağlanan yeraltı dayanacaq və 120 çarpayılıq mərkəzi xəstəxana var.

Prezident inşaatçılara, mühəndislərə və xarici tərəfdaşlara təşəkkür edərək bu layihələrin "Yeni Daşkənd"i işgüzar həyatın, turizmin və mədəniyyətin mərkəzinə çevirəcəyini bildirdi. Üç il əvvəl başlanan layihənin birinci mərhələsi 50 milyard dollar dəyərindədir; indiyədək burada 2 milyard dollarlıq yaşayış kompleksləri, universitetlər, kitabxana və amfiteatr tikilib.

Layihə ilə Azərbaycan Prezidenti İlham Əliyev də tanışdır: avqustun 23-də Özbəkistana səfəri zamanı o, Şavkat Mirziyoyevlə birlikdə "Yeni Daşkənd"in təqdimat mərkəzində şəhərin maketinə baxmış, layihənin "yaşıl və təhlükəsiz" beşinci nəsil şəhər konsepsiyası ilə tanış olmuşdu.