Mete xanın Dunhulara qələbəsi (təxm. e.ə. 206)

Mete e.ə. 209-cu ildə Hunların şanyusu olanda şərqdəki Dunhu birliyi güclü idi. Çin tarixçisi Sıma Syan yazır ki, Dunhular əvvəl Metedən onun min li gedən məşhur atını istədilər. Bəylər buna etiraz etdi, amma Mete "qonşu ilə bir at üstündə küsülü qalmaq olmaz" deyib atı verdi. Sonra Dunhular Metenin xanımlarından birini istədilər və Mete onu da verdi.

Üçüncü dəfə Dunhular iki ölkə arasındakı boş, heç kimin yaşamadığı torpağı istədilər. Bəylərin bəziləri "bu boş yerdir, vermək olar" dedi. Mete qəzəbləndi: "Torpaq dövlətin köküdür, onu necə vermək olar?" O, torpağı verməyi məsləhət görənləri cəzalandırdı, atına minib ordunu hücuma apardı.

Dunhular bu hücumu gözləmirdilər və ağır məğlub oldular. Bundan sonra Mete qərbdə Yüeçjiləri sıxışdırdı, cənubda isə Qin sülaləsinin aldığı Ordos torpaqlarını geri qaytardı. Belə yaranan Hun dövləti bir neçə il sonra Han imperatorunu Baydında mühasirəyə alacaq qədər güclü idi.