Qızdəvan döyüşü (1512)

Mərv döyüşündən sonra Babür Səfəvilərin köməyi ilə Səmərqəndi yenidən almışdı, amma 1512-ci ildə özbəklər onu oradan çıxardılar. Babür Şah İsmayıldan yeni kömək istədi. Şah sərkərdəsi Nəcm-i Sanini böyük ordu ilə Maveraünnəhrə göndərdi. Babür də ona qoşuldu.

Müttəfiq ordu Qarşını uzun mühasirədən sonra alıb Buxaraya doğru irəlilədi və Qızdəvan (Gijduvan) qalasını mühasirəyə aldı. 1512-ci ilin noyabrında Übeydulla xan və Canıbəy sultanın başçılıq etdiyi özbək ordusu köməyə gəldi. Döyüşdə Səfəvi-Babür ordusu ağır məğlub oldu, Nəcm-i Sani əsir düşüb öldürüldü.

Qızdəvan Maveraünnəhrin özbəklərin əlində qalmasını təmin etdi. Babür isə Səmərqəndi bir daha ala bilmədi və gözünü cənuba, Hindistana dikdi. On dörd il sonra Panipatda Babürlər imperiyasının əsasını qoydu.