Şorqoğal

Şorqoğal qat-qat xəmirdən hazırlanan dəyirmi qoğaldır. Nazik yayılmış xəmir layları yağlanıb üst-üstə qoyulur, zolaqlara kəsilir, dairə şəklində burulub yastılanır.

İçinə əridilmiş yağla qarışdırılmış ədviyyat qoyulur: razyana, zirə, darçın, zərdəçal, duz və istiot. Üzünə zəfəranla rənglənmiş yumurta sarısı çəkilir və xaşxaş səpilir — qoğal buna görə parlaq sarı olur.

Novruz şirniyyatlarının hər birinin rəmzi var: şəkərbura ayı, paxlava ulduzları, şorqoğal isə dəyirmi forması və sarı rəngi ilə günəşi təmsil edir. Şəkər və qozla bişirilən növünə şirin qoğal deyilir.