İssık-Göl vilayətində «Ak İlbirs» elmi-tədqiqat və reabilitasiya mərkəzi açıldı: qar bərsi və nadir heyvanların qorunması üçün

Qırğızıstanın İssık-Göl vilayətinin Ananyevo kəndində oktyabrın 23-də «Ak İlbirs» (Ağ qar bərsi) elmi-tədqiqat və reabilitasiya mərkəzi açılıb. Mərasimdə Nazirlər Kabinetinin sədri Adılbek Kasımaliyev və Tatarıstan Rəisi Rüstəm Minnixanov iştirak edib.

Mərkəzin məqsədi nəsli kəsilmək təhlükəsi altında olan qar bərsinin və digər nadir vəhşi heyvan növlərinin qorunması, onların genetik müxtəlifliyinin saxlanması və populyasiyanın bərpası tədbirlərinin hazırlanmasıdır. Burada elmi tədqiqat, baytarlıq yardımı və heyvanların reabilitasiyası üçün infrastruktur yaradılıb.

Kasımaliyev qar bərsini Qırğızıstanın milli simvollarından biri adlandırıb və layihəyə verdiyi töhfəyə, Qırğızıstan–Tatarıstan dostluq əlaqələrinin möhkəmlənməsinə görə Minnixanova təşəkkür edib. Mərkəz həmçinin elmi məlumat və təcrübə mübadiləsini, təbiətin mühafizəsi üzrə mütəxəssislərin hazırlanmasını nəzərdə tutur.