ADEX-2026 açıldı: 30 ölkədən 277 şirkət — sərgi tarixində rekord

Sentyabrın 30-da Bakı Ekspo Mərkəzində 6-cı Azərbaycan Beynəlxalq Müdafiə Sərgisi ADEX-2026 və 15 illik yubileyini qeyd edən Securex Caspian sərgisi açıldı. Üç günlük sərgiləri Müdafiə Sənayesi Nazirliyi təşkil edir.

Sərgilərdə 30 ölkədən 277 şirkət iştirak edir, 14 ölkənin milli pavilyonu qurulub. Bu, ADEX tarixində ən yüksək göstəricidir. Zirehli texnika, silah sistemləri, pilotsuz uçuş aparatları, sursat və elektron sistemlər nümayiş olunur.

Açılışda Müdafiə Sənayesi naziri Vüqar Mustafayev Prezident İlham Əliyevin sərgi iştirakçılarına müraciətini oxudu. Dövlət başçısı həmin gün sərgiləri ziyarət etdi.