Özbəkistan Dil Günündə latın qrafikalı özbək əlifbasının təkmilləşdirilməsi haqqında qanun qəbul etdi

Özbəkistan Prezidenti oktyabrın 21-də, Özbək Dili Günündə latın qrafikalı özbək əlifbasının təkmilləşdirilməsinə dair qanunu imzalayıb. Bu barədə Prezident Administrasiyasının rəhbəri Saida Mirziyoyeva məlumat verib və qərarı tarixi əhəmiyyətli adlandırıb. O, əlifbanın təkmilləşdirilməsi təklifini ilk dəfə 2023-cü il dekabrın 11-də cədidçilik irsinə həsr olunmuş konfransda səsləndirmişdi.

Rəsmilərin sözlərinə görə, yenilik mövcud yazı sistemindəki çatışmazlıqları aradan qaldırmağa, özbək dilinin rəqəmsal mühitdə mövqeyini gücləndirməyə və gənclərin savadlılığını artırmağa xidmət edir.

Keçid prosesi mərhələli olacaq: mövcud sənədlər, milli valyuta və qiymətli kağızlar qüvvədə qalır, dərsliklər, lövhələr və yol göstəriciləri isə xidmət müddəti başa çatdıqca tədricən dəyişdiriləcək.