Bakıda cüdo üzrə dünya çempionatı: Zelim Tçkayev gümüş, Ömər Rəcəbli bürünc medal qazandı

Bakıda davam edən cüdo üzrə dünya çempionatının dördüncü günündə Azərbaycan yığması 81 kq çəki dərəcəsində iki medal qazandı. Zelim Tçkayev finala qədər Moldova, BƏƏ, Belçika və Qazaxıstan təmsilçilərini məğlub etdi. Finalda o, gürcüstanlı Tato Qriqalaşvili ilə uzun sürən gərgin "qızıl xal" mübarizəsində uduzaraq gümüş medala sahib oldu.

Eyni çəkidə Ömər Rəcəbli təsəlli görüşlərində sloveniyalı rəqibini, bürünc medal uğrunda görüşdə isə qazaxıstanlı Abılayxan Jubanazarı iç-ponla məğlub edərək dünyanın üçüncüsü oldu.

Bununla ev sahibi Azərbaycanın çempionatdakı medallarının sayı dördə çatdı: Əhməd Yusifov (60 kq) qızıl, Zelim Tçkayev (81 kq) gümüş, Rəşid Məmmədəliyev (73 kq) və Ömər Rəcəbli (81 kq) bürünc. Azərbaycan medal sıralamasında Yaponiyadan sonra ikinci yerdədir. Çempionat oktyabrın 11-dək Milli Gimnastika Arenasında davam edir.